ठाणे | दिव्यांग मुलांच्या अंगी दडलेल्या कलागुणांना नवी ओळख आणि त्यांच्या कलेला मोठे व्यासपीठ मिळवून देण्यासाठी ठाणे शहरात लवकरच दिव्यांग कला केंद्र उभारण्यात येणार आहे. राज्यातील सर्व ३६ जिल्ह्यांतील दिव्यांग कलाकारांना या केंद्राच्या माध्यमातून आपल्या कलागुणांचे सादरीकरण आणि विकासाची संधी उपलब्ध करून देण्याचा महत्त्वाकांक्षी उपक्रम हाती घेण्यात आला आहे.
या उपक्रमांतर्गत ‘शोध कलाकारांचा, दिव्यांगाच्या कलागुणांचा’ या विशेष अभियानाचा नुकताच शुभारंभ करण्यात आला. दिव्यांग मुलांमध्ये केवळ सहानुभूतीची गरज नसून त्यांच्या क्षमतेला योग्य व्यासपीठ, प्रशिक्षण आणि प्रोत्साहन मिळणे आवश्यक आहे, या संकल्पनेतून हा उपक्रम पुढे नेण्यात येत आहे.
गायनापासून चित्रकलेपर्यंत मिळणार मोफत प्रशिक्षण
प्रस्तावित दिव्यांग कला केंद्रात दिव्यांग मुलांच्या विविध कलागुणांना वाव देण्यात येणार आहे. यामध्ये गायन, नृत्य, वादन, चित्रकला, हस्तकला यांसह विविध कलांचा समावेश असेल. विशेष म्हणजे या कलांसाठी दिव्यांग मुलांना मोफत प्रशिक्षण देण्याची संकल्पना आहे.
ग्रामीण आणि शहरी भागातील अनेक दिव्यांग मुलांमध्ये उत्तम कलात्मक क्षमता असूनही योग्य मार्गदर्शन आणि व्यासपीठाअभावी त्यांच्या प्रतिभेला अपेक्षित संधी मिळत नाही. हीच दरी भरून काढण्याच्या उद्देशाने या केंद्राची उभारणी करण्यात येत आहे.
३६ जिल्ह्यांतील कलाकारांना जोडण्याचा प्रयत्न
‘शोध कलाकारांचा, दिव्यांगाच्या कलागुणांचा’ या अभियानाच्या माध्यमातून महाराष्ट्रातील ३६ जिल्ह्यांमध्ये दडलेल्या दिव्यांग कलाकारांचा शोध घेऊन त्यांना एकत्र आणण्याचा प्रयत्न केला जाणार आहे. त्यांच्या कलागुणांना प्रोत्साहन देतानाच प्रशिक्षण, सादरीकरण आणि पुढील संधी उपलब्ध करून देण्यावर भर दिला जाणार आहे.
या उपक्रमामुळे दिव्यांग मुलांकडे पाहण्याचा दृष्टिकोनही बदलण्यास मदत होईल. दिव्यांगत्व ही मर्यादा नसून योग्य संधी मिळाल्यास त्यांच्यातील प्रतिभा समाजासमोर प्रभावीपणे येऊ शकते, हा संदेश या अभियानातून देण्यात येणार आहे.
किरण नाकती यांच्या मार्गदर्शनाखाली उपक्रम
या दिव्यांग कला केंद्राची संकल्पना साकारण्यासाठी शिवसेना पदाधिकारी आणि नौपाडा विभागप्रमुख किरण नाकती यांच्या मार्गदर्शनाखाली उपक्रम राबवण्यात येत आहे. दिव्यांग मुलांना कला क्षेत्रात स्वतःची ओळख निर्माण करता यावी आणि त्यांच्या प्रतिभेला योग्य दिशा मिळावी, यासाठी केंद्र महत्त्वाची भूमिका बजावणार आहे.
या उपक्रमाच्या शुभारंभप्रसंगी महापौर शर्मिला पिंपळोलकर, उपमहापौर कृष्णा पाटील, डॉ. प्रदीप उप्पल, सभागृह नेते हनुमंत जगदाळे, गटनेते पवन कदम, शिवसेना सचिव राम रेपाळे, राष्ट्रवादी काँग्रेसचे गटनेते नजीब मुल्ला, विरोधी पक्षनेते अश्रफ शानु पठाण आणि उपमुख्यमंत्री वैद्यकीय मदत कक्षाचे प्रमुख मंगेश चिवटे यांच्यासह विविध मान्यवर उपस्थित होते.
दिव्यांग कलाकारांसाठी नव्या संधींचे दालन
ठाण्यात उभारण्यात येणारे हे केंद्र केवळ प्रशिक्षण देणारे ठिकाण न राहता दिव्यांग कलाकारांच्या प्रतिभेला व्यासपीठ देणारे केंद्र म्हणून विकसित करण्याचा प्रयत्न आहे. राज्याच्या विविध भागांतील कलाकारांना एकत्र आणून त्यांच्या कलेला प्रेक्षक आणि समाजासमोर आणण्याची संधी मिळाल्यास अनेक नवोदित कलाकारांना आपल्या क्षमतेची नवी ओळख निर्माण करता येऊ शकते.
दिव्यांग कला केंद्र’ आणि ‘शोध कलाकारांचा, दिव्यांगाच्या कलागुणांचा’ हे अभियान ठाण्यासह महाराष्ट्रातील दिव्यांग कलाकारांसाठी आशेचा आणि संधीचा नवा अध्याय ठरण्याची अपेक्षा व्यक्त केली जात आहे.
