मुंबई | १८ ऑगस्ट २०२६ कांदिवली पूर्व विधानसभा मतदारसंघातील नागरिकांच्या विविध नागरी समस्यांकडे महानगरपालिकेचे दुर्लक्ष होत असल्याचा आरोप करत वंचित बहुजन आघाडीच्या कांदिवली पूर्व विधानसभा विभागाच्या वतीने आर-दक्षिण विभाग कार्यालयावर जनआक्रोश मोर्चा काढण्यात आला. नागरिकांच्या प्रश्नांकडे प्रशासनाचे लक्ष वेधण्यासाठी कार्यकर्ते आणि नागरिक मोठ्या संख्येने या आंदोलनात सहभागी झाले.
कांदिवली पूर्व परिसरातील नागरिकांना विविध मूलभूत नागरी सुविधांशी संबंधित समस्यांना सामोरे जावे लागत असल्याचा आरोप यावेळी करण्यात आला. वारंवार तक्रारी करूनही संबंधित प्रशासनाकडून अपेक्षित दखल घेतली जात नसल्याने नागरिकांमध्ये नाराजी वाढत असल्याचे आंदोलनकर्त्यांनी सांगितले.
नागरिकांच्या प्रश्नांवर तातडीने तोडगा काढावा आणि प्रशासनाने या समस्यांकडे गांभीर्याने पाहावे, या मागणीसाठी वंचित बहुजन आघाडीकडून चक्का जाम आंदोलनाचा इशारा देत प्रशासनाचा जाब विचारण्यात आला. या आंदोलनामुळे परिसरातील नागरी प्रश्न पुन्हा एकदा चर्चेत आले आहेत.
या जनआक्रोश मोर्चात वंचित बहुजन महिला आघाडी मुंबई प्रदेशाध्यक्ष स्नेहल सोहनी, मुंबई युवा अध्यक्ष सागर गवई, राजा भालेकर, रोनक जाधव, अजय रोकडे, दीपक खैरे, अंकुश जाधव, योगेश गमरे, संतोष मंडलिक, सरोज मगर, तेजस जामनिक, ॲड. अनिल ढवळे यांच्यासह मोठ्या संख्येने नागरिक आणि कार्यकर्ते सहभागी झाले होते.
कांदिवली पूर्वेतील नागरिकांच्या समस्या सोडविण्यासाठी प्रशासनाने तातडीने ठोस उपाययोजना कराव्यात, अशी मागणी यावेळी करण्यात आली.
